Estimado Prome Minister Dr. Luc Mercelina,

Nos a lesa bo kondenashon fuerte I pashona kontra e komentario ofensivo i rasista di miembro di parlamento Hulandés Thierry Baudet. Nos ta komendá bo kurashi pa papia palabra kla kontra e retorika kolonial, manipulashon demográfiko, i e idea degradante ku Karibe ahinda ta un región pa “repopulá” òf eksploitá.

Loke Sr Mercelina ta kondena awor komo un “fantasía kolonial” pa Sint Maarten, ta e realidat dolóroso ku Boneiru tabibando desde 2010. E deklarashonan di Baudet no ta un menasa nobo—nan ta simplemente un ekspreshon direktamente di un direkshon di politika ku ya a wordu realisá den silensio na Boneiru, ku konsekwensianan devastadór.

Desde e disolushon di Antia Hulandes i e aneksashon forsa di Boneiru komo un “teritoriale openbaar lichaam”  di Hulanda, nos a sufri: Un aumento di 400% den immigrashon, ku Hulandes Oropeonan ta haña derecho di vota den elekshon i referéndum lokal despues di 90 dia di yegada  – E desplazashon di e populashon nativo Boneriano, ku a baha di mas o ménos 80% den 2010 pa ménos ku 30% awe – Pèrdida di tera, akeso ekonómiko, identidat kultural i bos polítiko, pasobra lei Hulandes ta domina I para riba gobernashon lokal.

Un proseso igualá ku eliminashon di nos identidat étniko i kultural, disfrazá komo modernisashon.

Mientrastantu mundu ta skucha bo palabra fuerte kontrarekolonisashon, Boneiru ta biba e resultado ya mas ku un dékada —no komo spekulashon, sino komo realidat di tur dia.

Na 2015, pueblo di Boneiru ku gran mayoria den un referendum demokratiko a rechaza e status impone. Pero e mensahe kla I firme aki di autodeterminashon a wordu ignorá. Nos boluntat demokrátiko a wordu pone un banda. Na luga di trata nos komo partner den Reino, nos a wordu ekspulsá for di e struktura di Statuut, I keda sin protekshon òf rekonosimentu legal ò polítiko.

Ku shok I ku desilushon nos a wordu saka for di “Statuut”  ku no tabata solamente desishon di Hulanda, sino ku koperashon, akuerdo, ò silensio di nos partnernan Karibeño: Sint Maarten, Kòrsou, i Aruba. Mientras nan ta sigui funshoná komo país autónomo bou di e Statuut, Boneiru a wordu saka afo di Statuut, I suhetá na total dominashon unilateral di Hulanda. Silensio ta komplisidat?

Prome Minister Mercelina, nos mester trese un otro punto na atenshon ku hopi hende den Karibe a observa ku preokupashon: Sr Mercelina su rol na oktober anja pasa komo presidente di seshon na Nashonan Uni durante e kumbre “Pakto di Futuro.” Nos, ku status konsultativo di Nashonan Uni di ECOSOC, a presensia personalemte kon Sr Mercelina a wordu husa pa proyektá un imágen di inklushonKaribeño i harmonia den Reino —pero mientrastantu sr Mercelina tabata presidi e seshon, Boneiru i su pueblo tabata wordu sistemátikamente elemina — un pueblo desplazá, su boluntat I desishon demokrátiko negá, esakinan dor di politika ku ta reflehá ideologia di Baudet den práktika, sin mester deklare abiertamente.

Esaki ta krea konfushon i hasta un legitimashon falsu den wowo di Miembronan di Nashonan Uni, ekspertonan i komunidat internashonal. Ora un Prome Minister Karibeño ta aparese pa duna impreshon di un imágen di harmonia den Reino, mientrastantu nan islanan ruman ta wordu rekolonisá i depopulá, e resultado ta un interpretashon inkorekto di e realidat i ku ta mina nos lucha.

Nos ta urgi sr Mercelina pa papia tambe pa e hendenan ku ta sufri kaba bou di e mesun politika ku awor Baudet ta riska bisa na bos haltu. Rekonosé e krisis di derecho humano na Boneiru, i huza sr Mercelina su posishon pa bisa e berdat kompletu —pa tur pueblo Karibeño den Reino.

Sinseramente, ku respet i speransa, komo un Boneriano nativo ku a sobrebibí tres intento di asesinato i a wordu sera ilegalmente, mi ta hasi un yamada na Sint Maarten, Kòrsou i Aruba pa uni ku nos den nòmber di hustisia.