MINISTER ENDY CROES TA FELICITA E ALUMNONAN DI E.P.B. SAN NICOLAS CU NAN EXCELENTE ALMUERSO Y SERVICIO NA CADUSHI RESTAURANT
A brinda oportunidad na e alumnonan pa practica tecnicanan di trabou di restaurant
ORANJESTAD: Diabierna ultimo, Minister Endy Croes tabata invita pa un “3 course lunch” prepara pa e alumnonan di E.P.B. na Cadushi Restaurant di E.P.B San Nicolas. E almuerso a brinda e alumnonan di Unidad di Servicio di prome aña di e estudio nobo di Gastheer-Gastvrouw (ABO nivel2) y alumnonan di klas 3 di Keukenmedewerker nivel Doorstroom y Uitstroom e oportunidad pa practica tur e tecnicanan cu nan a siña relaciona cu trabou den un restaurant. Bou guia di nan docentenan, e alumnonan mes a prepara, cushina y sirbi e cuminda. Meta principal ta pa e alumnonan por sigui amplia nan conocemento y habilidad cu nan a desaroya durante nan estudio na E.P.B. San Nicolas. Alabes ta un bon preparacion y experencia pa e alumnonan eherece nan futuro profesion. E menu tabata consisti di un aperitivo; Ceviche “Punta Basora”, Refreshment “Seroe Colorado”, plato principal: Chicken “Butucu” galiña cu asparagus y ying yang sauce, como dessert: Central Madeirense cu a consisti di bolo di pistacho, bolo di chateau y bolo di cashupete acompaña cu “San Nicolas Store” esta un dushi koffie of te. Na e ocasion special aki a inaugura e logo oficial di Cadushi Restaurant door di Minister di Enseñansa y Deporte Endy Croes hunto cu vice presidente di SEPB Sra. Marieska Daña y e hoben Zarelda Lobban diseñado di e logo.
Na final di e merdia ameno, Minister Endy Croes a haya un recorido den e cushina di Cadushi Restaurant, unda el a felicita e alumnonan pa cushina un delicioso cuminda. E mandatario a expresa cu e alumnonan ta hopi bon prepara, el a keda inspira y motiva di loke a presencia. Finalmente, Minister Endy Croes ta manda palabranan di pabien na tur alumno pa e tremendo cuminda y excelente servicio. Danki na E.P.B. y directiva di S.E.P.B. pa e invitacion. Minister Endy Croes ta gradici director Sr. Rensley Mathilda y tur docente pa prepara e alumnonan asina bon pa asina nan por drenta den mercado laboral y/of continua cu nan estudio. Masha pabien.
