Category: Deporte

ORANJESTAD:  Den conferencia di prensa di diabierna ultimo Sjoerd de Vries a anuncia e gran apertura Aruba Open Beach Tennis Championships 2022. Presente na e ocasion tabata Minister di Deporte, Aruba Tourism Authority, Andrea Stutto di Italia un di e miho hungadonan di mundo y internacional ITF referee Massimo Morelli. Aruba Open Beach Tennis ta e evento deportivo mas grandi den Caribe. Bushiri Beach un biaha mas ta scenario di e torneo mas popular di mundo cu e aña aki ta conta cu participacion di 1200 atleta di 40 diferente pais cu ta batayando 1 siman largo pa gana premionan balora na e suma total di $60,000.00. Weganan ta cuminsa tur dia pa 9’or di mainta. Minister Endy Croes ta felicita sr. Vries organisado di Aruba Beach Tennis Open y tur cu di un of otro manera a contribui pa haci e torneo aki un realidad despues di 2 aña. Alabes mandatario di Deporte ta invita henter pueblo di Aruba pa bishita e campeonato di tennis mas grandi den Caribe. Exito na tur atleta cu e deseo, disciplina, dedicacion y determinacion boso ta logra.

ORANJESTAD: Dialuna atardi Minister Endy Croes tabata presente na aeropuerto internacional Reina Beatrix pa ricibi nos tri- atletanan femenino cu a regresa despues di a participa CARIFTA Triathlon & Aquathlon Championship 2022 cu a tuma luga na Bermuda. E hoben atletanan: Giovanna Wernet, Emma Gobert y Rebecca Jansen a conkista varios medaya durante e competencia. Den totalidad Aruba a logra un total di 10 medaya durante e dos dianan. Como pais Aruba a sali na di 3 luga di e competencia, esaki ta door di puntonan cu e ekipo acumula. Diamars den ora di atardi tri-atletanan masculino: Richard Sotelo, Christiaan Jansen y Jeon Fernandes ta regresa Aruba. Concluyendo Minister Endy Croes ta felicita y gradici nos tri-atletanan pa nan excelente prestacion y mayornan pa sostene nan yiu den nan deporte. Pabien cu excelente prestacion y logro. Nos ta orguyoso di boso!

ORANJESTAD: Diabierna atardi riba cancha di Denzel Dumfries di Cruyff Foundation na Jaburibari a tuma final di futbol femenino pa scolnan avansa den deporte escolar. E cuater scolnan Colegio Arubano, Colegio Nigel Matthew Aruba, EPB San Nicolas y La Salle College Aruba a bataya pa mira ta conkista e titulo maximo. Minister Endy Croes tabata presente pa duna sosten y apoyo na e futbolistanan den e final den Deporte Escolar 2022.

ORANJESTAD: Diadomingo mainta na Compleho Deportivo Frans Figaroa a tuma luga campeonato nacional di peso. Mandatario di Deporte a hiba palabra durante ceremonia di apertura di Aruba Nationals Championship 2022 organisa pa Amateur Weightlifting Association. Un total di 26 atleta local femenino y masculino a participa den categoria; “Youth Junior”, “Senior” y “Masters”. Ganado den categoria masculino senior: Laertes Araque cu 257 kg. Ganado absoluto den categoria femenino ta Nathaly Geerman cu a hisa total 195kg. Den categoria “youth” ganado absoluto hende muhe Caythyline Lanoy cu 123 kg. Den categoria masters ganado absoluto ta Rene Rudel cu a hisa 228kg. Minister Endy Croes ta felicita Amateur Weightlifting Association y tur cu a contribui pa haci e competencia uno exitoso! Masha pabien na e ganadonan. 

ORANJESTAD: Diahuebs anochi den un esfera ameno a tuma luga introduccion di un proyecto nobo pa deporte di baseball “Proline Winter Baseball League”. Durante e “Drafting Night” e cuater ekiponan, manager y “coaching staff” a keda conoci. Ekiponan di Panthers, Tigers, Lions y Jaguars lo midi forsa contra di otro pa seis siman largo pa conkista e titulo di campeon, di e prome edicion di Proline Winter League. E campeonato di baseball lo bira uno di aproximadamente 40 wega di hungadonan den e edad di 18 aña pariba hungando den baseball na e.o. Aruba, Curaçao, Italia, Hulanda, Czechoslovakia y Merca.

ORANJESTAD: Diahuebs atardi den un esfera ameno Minister Endy Croes a reuni cu sr. Rhudy Donata y sra. Raquel Wester, representantenan di Aruba Little League. Un reunion informativo unda a dialoga riba e.o. structura di little league, entrenandonan y con pa yuda little league pa ta mas exitoso. Tambe a trata e peticion di ayudo pa seleccionnan cu lo sali otro aña pa representa Aruba den exterior. Mandatario di Deporte a informa cu tin container cu materialnan di deporte cu a yega Aruba y den coordinacion cu nan miembronan por haya material. Concluyendo e Minister Endy Croes a indica cu tabata un bon reunion unda Aruba Little League a trece nan puntonan dilanti y den un bon comunicacion a haci diferente palabracion pa e aña binidero. Nos ta sigui traha pa deporte y nos deportistanan cu ta central den vision di Gabinete Wever – Croes II.