Minister Wendrick Cicilia enfocando riba turismo crucero cu mas impacto pa e localnan 

Oranjestad, Aruba – Durante Seatrade Cruise Global na Miami, Minister di Turismo, Transporte y Labor mr. Wendrick Cicilia tabatin un encuentro productivo cu ehecutivonan di crucero conhuntamente cu delegacion di Aruba, entre nan Marc Figaroa, Ronella Croes, Philippe La Reine, Mario Arends, Patrick Melchior, Monica Bos y Rowin Bisslik. E reunion a enfoca riba fortalece e impacto di turismo crucero riba economia local.

Durante e reunion, Minister Cicilia a ripiti su vision di move den direccion di un modelo di turismo basa riba balor, poniendo prioridad riba gasto promedio mas halto pa bishitante en bes di un aumento desproporcional den volumen. Den e cuadro aki, el a enfatisa cu Aruba ta confronta un presion significativo como destinacion madura, exigiendo un crecemento balansa y sostenibel.

Un di e puntonan clave di e reunion tabata crea mas oportunidad pa negoshinan local beneficia directamente di turismo crucero. Tambe a papia riba e posibilidad pa incentiva e bishitantenan pa prolonga nan estadia pa experencia mas di loke e ofertanan local tin di ofrece, incluyendo iniciativanan manera Ban Bek Caya y Carubbian den e cayanan di San Nicolas. 

Den anticipacion di e iniciativa di Cruise Connect, Minister Cicilia a enfatisa e importancia di involucra un cantidad mas grandi di operadonan di tour local, garantisando un participacion mas amplio y mas balansa dentro di e cadena di balor di e sector.

Tambe a trata e concepto di “Marine Rest Day”, un medida dirigi na promove sostenibilidad y proteha e recursonan natural di nos isla, alinea cu e esfuersonan di gobierno pa garantisa desaroyo turistico responsabel.

Minister Cicilia a reafirma su compromiso pa garantisa cu e beneficionan di turismo crucero ta traduci den oportunidadnan y prosperidad mas grandi pa e comunidad local. “Nos enfoke ta cla; turismo cu ta genera balor real pa nos hendenan, mientras ta proteha loke ta haci Aruba unico”, Minister Cicilia a enfatisa.