ORANJESTAD (22 di april 2026) – Recientemente, fraccion di AVP a haci un bishita oficial di comision na Stichting Algemene Bejaardenzorg Aruba (SABA), unda nan a ricibi un presentacion amplio tocante e futuro, vision y sostenibilidad di e organisacion, cu tin un rol crucial den e cuido di nos adultonan mayor.

Durante e encuentro, representantenan di SABA a comparti informacion importante tocante e diferente retonan cu e institucion ta enfrenta den e cuido diario di nos grandinan. Entre esakinan tabatin e falta di personal califica, presion financiero continuo, y e necesidad urgente pa modernisa infrastructura y servicio pa por responde na e demanda creciente. A keda cla cu Aruba ta drenta den un fase demografico unda e poblacion ta bira mas grandi den edad, locual ta crea un demanda cada bes mas grandi pa cuido di calidad.

Fraccion di AVP a scucha cu hopi atencion e plannan cu SABA tin pa fortalece e calidad di cuido, mehora e condicionnan di trabou pa e personal, y amplia e capacidad di e organisacion pa sigui brinda atencion digno, humano y profesional na nos adulto mayor. Durante e dialogo, tambe a enfatisa e importancia di desaroya un sistema sostenibel pa e sector di bejaardenzorg, cu no solamente ta depende di subsidio, pero cu ta basa riba un planificacion di largo plazo cu lo garantisa continuidad, stabilidad y siguridad den e cuido. Esaki ta particularmente relevante den bista di e introduccion di e concepto di ley pendiente pa regula y fortalece e sector.

Un punto central den e discusion tabata e necesidad pa mas colaboracion structural entre gobierno, sector di salud, y diferente instancia social pa sigura cu e sector di cuido pa adulto mayor ta ricibi e apoyo necesario. E presentacion a confirma cu SABA ta traha cu gran dedicacion, compromiso y un profundo sentido di responsabilidad pa proteha e bienestar di nos adultonan mayor.

Fraccion di AVP a expresa nan sincero aprecio pa e trabou valioso cu SABA ta haci tur dia y a reconoce cu e organisacion ta un pilar fundamental den nos sistema social y di salud. AVP a reafirma nan compromiso firme pa sigui pone e tema di cuido pa adulto mayor na e agenda politico, cu e meta claro pa garantisa un futuro cu dignidad, siguridad y bienestar pa tur nos grandinan na Aruba.