Apertura di Aña Parlamentario Minister Wendrick Cicilia: Awo Aruba tin un Gobierno di pueblo y pa pueblo

Oranjestad- Diamars mainta, 9 di september, tabata e inicio di Aña Parlamentario nobo. Minister mr. Wendrick Cicilia hunto cu demas coleganan minister di Gabinete AVP-FUTURO, miembronan di Parlamento y diferente director di institutonan di Aruba tabata den Parlamento di Aruba pa presencia e discurso di Gobernador di Aruba SE drs. Alfonso Boekhoudt. 

Minister Wendrick Cicilia a enfatisa cu e palabra cu mas a destaca durante e discurso ta: “prosperidad comparti”, pa motibo cu pa shete aña largo a exclui nos comunidad di un miho calidad di bida y a neglisha nos pais pa falta di inversion. Gabinete AVP-FUTURO a dicidi cu e recursonan financiero, e placa di pueblo, mester bay bek pa pueblo pasobra awo tin un Gobierno cu ta di pueblo y pa e pueblo. Por mira cu e liñanan grandi di pensamento di Gobierno di Aruba ta pa comparti properidad, mehorando e experiencia di bida di nos hendenan, pensionadonan ta haya aumento y esnan cu tin mester di un asistencia social ta hay’e. 

Ademas a introduci e ‘minimumuurloon’ y por mira tambe cu a aparta mas di 50 miyon pa inversion den nos pais. Loke Gabinete AVP-FUTURO kier enfoca riba dje ta pa eleva e experiencia di bida di nos hendenan y alabes inverti den nos pais. Loke ta importante, for di e angulo di turismo, ta cu e maneho nobo ta enfoca riba diversificacion di e mercado pero mas importante ta pa percupera cu e prosperidad di turismo tin un impacto postivo directo pa nos hendenan, nos autenticidad y tambe den conservacion di nos naturalesa.

Pa loke ta trata maneho di labor, lo keda enfoca pa ataca e escasez laboral y na mes momento empodera y fortifica e posicion social, economico y legal di esnan cu ta eherce labor na Aruba. “Nos ta sumamente orguyoso di loke nos a logra caba, nos tin un Gobierno di pueblo y pa pueblo”, asina Minister Wendrick Cicilia a finalisa bisando.