“Asfalt no ta un luho; gobierno mester sinta cu DOW y pone un plan cla pa turbario”
Parlamentario Carlos Bermudez (AVP):
ORANJESTAD (2 di september 2025) — Parlamentario di AVP, Carlos Bermudez, ta
pidi accion inmediato riba infrastructura, particularmente e parti di asfalt den bario y
camindanan secundario. Bermudez a entrega un mocion pa Minister di Infrastructura,
Renee Herde, pa e por sinta cu DOW pa, no solamente papia di e plan cu tin pa asfalta
algun caminda principal aki na Aruba, pero tambe pa saca tur e cartanan cu
ciudadanonan a entrega caminda nan a haci peticion pa asfalt y cu te dia di awe nan no
a haya ningun contesta.
Segun Bermudez, durante un reunion reciente a surgi un punto di preocupacion serio:
“e gobierno anterior a bay laga un debe di por lo menos 2.3 miyon florin. Cu awor aki
gobierno a paga caba 900 mil, pero ainda tin un debe habri di 1.4 miyon cu mester
paga prome cu por bay paga pa ricibi asfalt.” E debe aki ta keda como un obstaculo
directo pa traha caminda y duna alivio na bario.
Bermudez ta enfatisa cu “asfalt no ta un luho mas.” E impactonan di stof y lodo riba
salud y riba auto ta real y diario. E ta duna ehempel cla di peticionnan cu ta stagna for
di añanan: “vecindario di Tanki Leendert… a entrega un peticion di aña 2017… na 2024
nan a bolbe haci un peticion… niun contesta. Tambe un caminda na JR na Noord,
Turibana bin arriba t’un caminda di santo pero basta malo y Ser’i Janchi y Kudawecha
cu desde 2017 a haci peticion tambe a ser gaña y te dia di awe nan no a haya un
druppel di asfalt.”
E ta invita Ministerio y DOW pa wak mas leu cu asfalta caminda principal y bay den
bario: “mi kier mira DOW cana den bario, den e cayanan… no kier mira nan sinta tras di
bureau ta wak Google Maps.” Den mes spiritu, Bermudez ta pidi un plan amplio pa cu
limpiesa y seguridad vial, inclui “sleeping police” na luganan cu hopi trafico: “Bubali… ta
wardando 8 pa 9 aña… Alto Vista… ta suplicando pa un sleeping police.”
Como salida concreto, e ta urgi: “sinta cu DOW traha un plan multianual caminda bo ta
pone tur e peticionnan cu pueblo a haci, bo ta pone nan riba un rij anto bo ta cuminsa
traha un plan pa splica pueblo ki tempo nan ta yega na beurt.” Segun Bermudez,
pueblo ta dispuesto pa warda si tin fecha y claridad, “pero no manera… 2017… 2025, 8
aña despues ni un druppel di asfalt.”
Bermudez a compromete su propio apoyo operativo: “mi mes lo traha un documento pa
mi mustr’e unda pueblo ta desea di haya asfalt, unda pueblo ta desea di haya sleeping
police, unda pueblo ta desea di snoei.” E ta cuminsa cu Noord — pasobra mi ta mira cu
berdaderamente Noord a wordo laga un banda pa hopi aña” — y despues bay cu
Paradera, Savaneta y San Nicolas.
