Partido MEP : DICON MINISTER GERLIEN CROES TIN ASINA TANTO RABIA?
Den apenas algun luna, pa ta exacto, mane cu resultado di eleccion a bira conoci, e mascarada a cay y e berdadero cara di Gerlien Croes a manifesta, combirtiendo su mes den un hende amarga y yen di rabia.
Ta fresco den nos memoria con arogante el a bira den formacion. Ta fresco den nos memoria cu cuanto rabia riba AVP y su candidatonan el a bin ta expone y impone den AVP.
No por supera su mes!
Durante su carera Parlamentario, cada disertacion di dje tabata carga di odio y envidia. Cada biaha e odio y envidia tabata strob’e di enfoca riba e topico pa constructivamente contribui n’e topico dje reunion pa bienestar di Aruba. Su focus tabata specialmente e rabia contra ex ministernan Evelyn Wever-Croes y Xiomara Maduro.
Mientras tanto Gerlien Croes a bira Minister, pero ta manera un cos cu e no a logra supera ni surpasa tur e odio y envidia cu e ta carga den su alma.
E sumpiña ey ta keda hiring’e y partido MEP ta compronde. Dicon? Xiomara Maduro tabata un Minister cu ta gosa te cu awe di respet y admiracion internacional pa e forma capas y efectivo cu el a maneha finansas di nos Pais. No lubida cu MEP a hereda un pais na borde di bancarota y cu awe 7 aña despues ta conta cu un surplus di 500 miyon florin.
Pa loke ta nos lider Evelyn Wever Croes, e ta un lider cu a destaca tambe internacionalmente, pa entre otro e forma con el a sa di carga nos pais y cada famia riba e baranca aki durante e etapa mas scur den nos historia cu tabata COVID. Pa despues bou di su liderazgo, Aruba bira e pais lider den region como esun cu a sa di recupera y sali sumamente exitoso for di e pandemia. Danki na su liderazgo Aruba a bira number den region.
Pues Gerlien sa cu e tin sapato hopi grandi pa bay yena y obviamente ta demostrando di no por. Su unico recurso pa purba “sobresali”, cual semper el a recuri bek na dje, ta di hiba atakenan sin contenido a base di mentira, ciega pa rabia, domina pa envidia y purba atacha Xiomara y Evelyn.
A bira tempo pa Gerlien stop di colga na saya di MEP, y sconde tras di Xiomara y Evelyn, y cuminsa goberna pa caba aunke cu keto bay e ta cayendo den bashi. Gerlien por ta carga e titulo di meester pero esey no ta haci bo un bon gobernante mucho menos un bon politico.
Gerlien Croes mester stop di wak den cura di MEP y cuminsa distingui su mes demostrando ki gran minister e ta kere cu e lo por ta.
