Kresementu di forsa di kompra na Hulanda Karibense na 2021 ménos fuerte
E forsa di kompra na Hulanda Karibense a subi atrobe na 2021, pero ménos fuerte ku na 2020. Na Boneiru, e poblashon a bai dilanti ku 1.1 porshento kompará ku 2020, na Sint Eustatius esaki tabata 0.5 porshento i na Saba 0.1 porshento. Den kaso di persona den kas di famia ku yu i hende ku ta traha, e forsa di kompra a subi mas fuerte. CBS ta informá tokante esaki a base di su sifranan nobo.
Pa mehorá e seguridat di sobrebibensia na Hulanda Karibense, for di 2019 ta tuma pasonan struktural pa oumentá e salarionan mínimo i e benefisionan sosial, i asina mehorá e forsa di kompra. Na 2021, e supsidio pa mucha a keda oumentá. E medidanan di ayudo pa corona, ku tabata kompensá pèrdida di entrada di empleado i persona independiente, tabata ainda na vigor. No a adaptá e benefisionan sosial i salario mínimo na e deflashon di 2020. E oumento di e nivel medio di preis na 2021 na Boneiru i Saba a influensiá e forsa di kompra. Na Sint Eustatius, e nivel di preis a baha un tiki, loke tabata tin un efekto positivo riba e forsa di kompra.
Mehorashon di forsa di kompra pa trahadó
E forsa di kompra promedio di personanan den kas di famia ku yu ku a mehorá riba tur tres isla. Na Boneiru, e forsa di kompra a subi ku 1,7 porshento pa e grupo aki, esaki tabata e oumento di mas haltu. Un kambio di e promedio di forsa di kompra di 1.7 porshento ta enserá ku pa mitar di e personanan nan forsa di kompra a oumentá ku 1.7 porshento o mas i e otro mitar ménos.
Pa esun ku ta haña un benefisio sosial na Boneiru i Saba, e forsa di kompra a baha, dor ku no a adaptá e benefisionan sosial na e inflashon.
Mas forsa di kompra pa kas di famia ku yu
Riba e tres islanan, e forsa di kompra a mehorá den promedio pa personanan den kas di famia ku yu. Na Boneiru, e forsa di kompra a eksperensiá e subida di mas haltu den kaso di famianan ku un solo mayor (+3,1 porshento). E forsa di kompra na Saba a krese mas tantu den kaso di parehanan ku yu (+2,5 porshento). Na Sint Eustatius, tambe personanan den kas di famia sin yu a benefisiá di un forsa di kompra mehorá.
Hóbennan a mira e mehorashon mas grandi di forsa di kompra
Personanan den kas di famia ku un proveedor prinsipal di entrada te ku 40 aña a mira nan poder di kompra oumentá mas tantu riba tur tres isla. E forsa di kompra na Boneiru a oumentá ku 2.7 porshento serka nan, 2.5 porshento na Sint Eustatius i 2.4 na Saba. E mayoria di e proveedornan prinsipal di entrada den kasnan di famia aki ta traha i normalmente ainda ta den e fase di konstrukshon di nan karera. Nan entrada ta oumentá dor di eksperensia di trabou i dor ku nan ta optené trabou ku ta paga mihó.
Mehorashon di forsa di kompra pa entradanan mas abou na Sint Eustatius
Den e grupo di entrada mas abou na Sint Eustatius, e forsa di kompra a subi ku 0,9 porshento, esaki tabata e subida mas haltu den tur grupo di entrada; dos tersera parti di e personanan a mira nan forsa di kompra mehorá, prinsipalmente pa motibu di deflashon i supsidio pa mucha oumentá. Na Boneiru e promedio di forsa di kompra a mehorá hustamente mas tantu pa personanan den kasnan ku e entradanan mas haltu, respektivamente ku 2.7 porshento.