MINISTER ENDY CROES A RICIBI BISHITA DI SR. EGMOND MOLINA CU TA PREPARANDO PA UN OTRO GUINNESS WORLD RECORD

ORANJESTAD: Siman pasa, Minister Endy Croes a reuni cu Sr. Egmond Molina. Sr. Molina ta un personahe hopi conoci den deporte di entre otro, combate, cross fit y gym. Den e ultimo añanan Sr. Egmond Molina a kibra varios record mundial pa asina pone su nomber y Aruba su nomber den Guinness World Records Book. Recientemente, Sr. Molina a logra su di tres record mundial e biaha aki door di trek e bus cu su djente pa e distancia mas largo cu tabata existi y e peso di 11 ton. Sr. Molina su proximo hazaña ta trek e bus cu un dede. Durante e reunion Sr. Egmond Molina a comparti cu Minister Endy Croes e ultimo desaroyonan di su preparacion y plan. Minister Endy Croes a indica cu e plannan aki no ta bay sin un costo y pa wordo reconoci den e Guinness World Records Book ta un fase. Minister Endy Croes a priminti di duna un sosten pa asina Sr. Egmond Molina por logra su hazañanan y pone Aruba su nomber un bes mas riba mapa mundial. Mas cu claro nos lo percura pa brinda pueblo e informacionnan necesario momento cu esakinan tuma luga. Pa finalisa Minister Endy Croes a indica cu e tabata bon reunion y nos ta sostene ideanan pro activo asina pa pais Aruba.