Prome Minister Evelyn Wever-Croes:

𝗘𝗻𝘁𝗿𝗮𝗻𝘁𝗲 𝟭 𝗝𝗔𝗡𝗨𝗔𝗥𝗜 𝟮𝟬𝟮𝟯:
𝗦𝗔𝗟𝗔𝗥𝗜𝗢 𝗠𝗜𝗡𝗜𝗠𝗢 𝗬 𝗣𝗘𝗡𝗦𝗜𝗢𝗘𝗡 𝗗𝗜 𝗕𝗜𝗘𝗛𝗘𝗦 𝗧𝗔 𝗦𝗨𝗕𝗜, 𝗬 𝗧𝗔𝗥𝗜𝗙𝗔 𝗗𝗜 𝗕𝗘𝗟𝗔𝗦𝗧𝗜𝗡𝗚 𝗧𝗔 𝗕𝗔𝗛𝗔

Entrante prome di januari 2023, salario minimo lo wordo aumenta, pensioen di biehes tambe lo aumenta, lo aumenta reparatie toeslag di pensionadonan y lo reduci impuesto di pensionadonan door di haci calculacionnan separa. Mester menciona, cu Gobierno lo baha impuesto riba tur salario y entrada di tur hende.

DECISION Y ESFUERSONAN DI GOBIERNO PA MEHORA COSTO DI BIDA
A traves di e esfuersonan aki, poder di compra di ciudadanonan lo mehora, y asina e calidad di bida di nos hendenan tambe ta mehora, comunidad lo bay sinti mas e beneficionan y efectonan positivo di decisionan cu gobierno a tuma pa trece alivio pa comunidad, especialmente pa e grupo di personanan mas vulnerabel.

Prome Minister Evelyn Wever-Croes a duna di conoce cu mientras cu Gobierno lo introduci e cambionan positivo aki na comienso di otro aña, e deseo ta pa por haci hopi mas pa comunidad. Lamentablemente pa motibo cu tin cu cumpli cu debenan crea door di gobierno anterior, e espacio financiero ta limita. A pesar di esaki, e ta importante pa comunidad keda positivo y sa cu Gobierno actual ta trahando serio y responsabel, creando mas posibilidad pa por duna mas na comunidad.