Proyecto 3DXVerse ta impulsa innovacion digital y sostenibilidad den aviacion na Aruba
Colaboracion cu Union Europeo ta sigui genera innovacion na Aruba, e biaha aki cu e proyecto tecnologico “3DXVerse”, presenta pa Gino Schwengle. E iniciativa ta forma parti di un Horizon Project, den colaboracion cu un consorcio internacional di universidad y empresa nan Europeo,
E proyecto ta enfoca riba modernisacion di experiencia di biahe, introduciendo uzo di “digital travel credentials”. Den colaboracion cu Aruba Tourism Authority (ATA), Immigracion di Aruba, AAA y Directie Luchtvaart di Aruba, e sistema ta permiti pasaheronan crea un “pasport digital” riba nan telefoon, cu nan por comparti cu inmigracion prome cu nan yega Aruba.
Esaki ta permiti un proceso mas rapido na frontera, unda biahero no tin cu presenta pasport fisico. Mediante uzo di tecnologia di reconocimento facial, identidad di pasahero ta verifica den apenas algun seconde na e-gates, reduciendo significativamente tempo di espera.
Ademas di facilitacion di biahe, e proyecto ta incorpora un componente innovador di sostenibilidad. A traves di un sistema digital, biahero por haya un indicacion di su carbon footprint relaciona cu su biahe pa Aruba.
E iniciativa ta bay un paso mas leu, permitiendo bishitante participa activamente den compensacion cu ta causa impacto, door di actividadnan local manera plantacion di mangrove, generando “carbon credits” durante nan estadia.
Segun Schwengle, e proyecto ta duna empresa local acceso na colaboracion internacional y conocimento tecnico, reduciendo costo di desaroyo y facilitando innovacion den escala global.
“E colaboracion ta permiti nos desaroya producto innovador cu menos costo y cu apoyo di experto internacional,” el a indica, resaltando e balor di participacion den consorcionan Europeo.
E proyecto 3DXVerse ta demonstra con colaboracion cu Union Europeo no solamente ta aporta sosten financiero, sino tambe ta crea oportunidad pa transferencia di conocimento, innovacion tecnologico y desaroyo sostenible na Aruba.
