Dialuna Minister di Husticia, Integridad, Transporte Publico y Energia mr. drs. Arthur Dowers a haci un bishita strategico na Forensisch Centrum Teylingereind na Hulanda, unda el a hiba combersacion riba e maneho di detencion y tratamento di hobennan cu a drenta den conflicto cu ley.
E modelo di Teylingereind ta basa riba un acercamento structural, unda tratamento, enseñansa y desaroyo di habilidadnan ta core den un solo direccion: prepara e hoben pa integra bek dignamente den sociedad.
E centro ta traha cu un sistema di dag besteding disciplinario, combina cu enseñansa formal y formacion practico. Hobenan ta haya e oportunidad pa desaroya nan mes, construi responsabilidad y gana habilidadnan cu tin balor real despues di detencion.
Minister Dowers a enfoca riba e importancia di inversion den modelo cu ta mira mas leu cu castigo. Pa trece cambio real, mester traha riba e desaroyo humano, confiansa y responsabilidad.
Den e combersacion, a papia tambe riba e desaroyo cu ta tuma luga na Aruba y e necesidad pa sigui fortalece un sistema cu ta responde na realidad local, pero cu ta habri pa cooperacion den Reino.
Un punto central tabata crea un laso pa sigi comparti conocemento y experencia entre Aruba y Hulanda, cu e obhetivo pa implementa ehempelnan cu ta contribui na un sistema mas efectivo y sostenibel.
Aruba tin cu move pa un modelo mas strategico, unda detencion di hobennan no ta nifica fin di nan futuro, pero hustamente ta dunanan e oportunidad pa cambio positivo.
Ta tempo pa construi un sistema penitenciario cu ta ofrece speransa, crea oportunidad y fortalece nos comunidad.
