Bo Informado.tv

Riba diamars merdia, riba e ultimo dia di tratamento di e Ley di Presupuesto 2022, mi a presenta den sala di Parlamento mi betoog di segunda ronda, den cual mi a pone enfasis riba e importancia pa gobierno y tambe Parlamento di Aruba traha na un forma serio, responsabel y cu integridad. Pueblo di Aruba a scoge representantenan pa forma un gobierno y un Parlamento digno. Representantenan di pueblo semper mester set un standard halto den nan caracter, actitud y estilo di bida pasobra nan ta un ehempel pa pueblo.

Aña pasa nos a trata e Ley di Integridad pa ministernan, manera e ta wordo yama popularmente den boca di pueblo. Prome y durante di e reunion publico aki, mi a nota cu masha hopi hende den pueblo a vocifera atraves di e plataformanan social; “Y kende ta controla esnan cu ta controla gobierno?” Mi por a percibi claramente cu pueblo tabata mandando un mensahe cla y raspa pa henter Parlamento di Aruba! Pueblo ta exigi mas transparencia y seriedad di gobierno pero tambe di su representantenan den Parlamento.

Den luz di e deseo aki cu a resona fuertemente den pueblo, mi a traha un mocion pa por logra exactamente esey! Den e mocion aki mi ta menciona cu pueblo kier wak mas calidad den su parlamentarionan y cu nan bida berdaderamente mester refleha e virtudnan y caracter cu pueblo ta buscando. Den e mocion cu mi a presenta, ta yama tur parlamentario pa ta parti di un comision cu ta bay concipia un ley di inicitiva cu ta adresa miembrecia di Parlamento relata na asuntonan penal, pa asina salvaguardia e imagen di Parlamento.

Sinembargo e ta un lastima pa wak con oposicion, sin duna mucho comentario, a vota contra di e mocion aki. Un momento lamentabel y tristo pa e imagen di parlamento. Nos cu ta hibando e lucha sagrado aki den Parlamento ta compronde con importante e ta pa sigui traha caminda pa integridad por wordo estableci tur caminda. No por exigi esaki solamente di gobierno, pero tambe integridad mester ptrevalece den Parlamento di Aruba. Ta di lamenta cu no a wak tampoco ningun otro tipo di iniciativa of un otro plan di parti di oposicion pa demostra cu nan kier wak un Parlamento integro.

Esaki sigur ta un muestra di falta di seriedad y falta di compromiso total cu nos pais. Nos por wak un oposicion cual ta mas interesa den protege su propio interesnan, enbes di ta luchando p’e integridad y balor di nos pais. Un oposicion cu ta hopi show dilanti di camara, sinembargo ora ta trata temanan crucial pa salvaguardia y fortifica e integridad y husticia di nos pais, oposicion semper ta vota contra! E idea ta pa parlamentarionan sinta hunto pa discuti y dicidi di ki forma e ley aki ta bai wordo asambla, cual ta bai ta su contenido y con por establece esaki responsablemente. Esaki lo exigi madures politico di parti di un oposicion cu cada ves atrobe ta demostra cu integridad no ta parti di nan agenda.