Nos t'ey pa Informa bo
Willemstad – Prof. dr. Raymond Gradus ta renuncia entrante dia 1e di februari 2023 como presidente di Colegio di supervision financiero di Corsou y Sint Maarten, Colegio di supervision financiero di Boneiro, Sint Eustatius y Saba y Colegio di supervision financiero di Aruba. Cu esaki su di dos termino ta finalisa un poco prome cu e fecha riba cual e mester a expira, esta dia 1e di juli 2023.
Dialuna october 24 e caso avestruz a continua den corte, den cual tin varios sospechoso hunto cu e sospechoso principal Benito Sevinger. Benito tin 5 acusacion serio contra di dje; 1)Falsificacion, 2)Estafa, 3)Labamento di Placa, 4)Abuso di funcion, y 5)Soborno. Riba e dia di dialuna a trata riba e caso Deshaun di Leoncita Arends. Banda di Benito tabata presente sr. Abath cu tabata director di DIP, Sra. Winterdaal y sr. Rojas.
Manera ta conoci ta existi diferente rapport cu ta duna atencion na topico “ease of doing business” y tambe cu ta trata ampliamente e necesidad pa elemina e red tape cu ta obstaculisa iniciativanan di negoshi door cu gobierno tin un proceso burocratico, lento y inflexibel. Pesey mes Gobierno a bin ta traha riba un maneho di permiso modernisa y awor cu e Vestigingsbeleid 2022 a keda cla, a bin presenta esaki na Parlamento. Manera a keda accentua door di Minister Wever e maneho ta dirigi pa elemina red-tape, crea mas desaroyo economico, incentiva mas inversion, crea e cuponan di trabou necesario y asina por sigui menciona. Prinicipalmente e mehoransa aki mester traduci su mes, den mas negoshi y mas entrada pa caha di gobierno.
Diadomingo awo Partido Movimiento Electoral di Pueblo MEP ta organisa su Congreso di Partido na unda cu lo re-eligi su Lider pa e proximo 4 añanan. Nos Lider Evelyn Wever-Croes na cabes di MEP y como Minister President di Aruba a sa di guia nos Pais den e momentonan mas dificil di nos historia. Evelyn tabata tey pa MEP y pa Aruba na e momentonan cu mas nos Partido y Pais tabata tin mester di un Lider firme y humano. Como un colega di Evelyn den partido y den gobernacion, mi por bisa cu Evelyn tin tur cualidades necesario y ta e miho lider pa keda guia MEP y Aruba den e rumbo di recuperacion y progreso.
Philipsburg – Colegio di supervision financiero di Corsou y Sint Maarten (Cft) a urgi Sint Maarten den combersacionnan reciente pa aproba e modificacion di presupuesto di 2022 y e presupuesto di 2023 na termino cortico. E modificacion di presupuesto di 2022 ta inclui un suma di ANG 15,4 miyon na inversion, den cualnan Sint Maarten kier haci uzo di e suscripcion coriente di Hulanda. E inversionnan specifico ta contribui na un crecemento economico sostenibel. Ademas, e Ley di Reino di supervision financiero di Corsou y Sint Maarten ta indica cu Sint Maarten mester tin e presupuesto di 2023 aproba prome cu dia 15 di december 2022. E presupuesto aki mester ta balansa den servicio ordinario.
ORANJESTAD – Henter Conseho di Partido MEP a demostra confiansa den su Lider cual diadomingo un biaha mas ta keda proclama como e lider di e Partido y e lider pa e siguiente gobernacion. Nos Prome Minister sra. Evelyne Wever Croes a demostra di ta un lider cu por goberna Aruba den lamanan bruto. Un lider cu semper a traha cu determinacion, vision y amor pa su patria.
ORANJESTAD: En conexion cu dia Nacional contra Traficacion di Hende, Minister Endy Croes hunto cu Prome Minister Evelyn Wever – Croes a presencia lansamento di e pakete educacional tocante Traficacion y Contrabanda di Hende, “Lespakket Mensensmokkel Mensenhandel”. E ta un pakete special pa studiantenan di scol secundario entre 12 pa 18 aña cu ta duna informacion tocante traficacion y contrabanda di hende. Ta importante pa hobennan ta alerta pa señalnan di posibel traficacion y/of contrabanda di hende sea pa nan mes of esnan cerca di nan tanto na Aruba como den exterior.
ORANJESTAD: Diaranson mainta den un esfera ameno Minister Endy Croes a reuni cu directora di SKOA, sra. Anuesca Baly y sra. Jessica Maduro – Irausquin, unda a toca diferente temanan di enseñansa, como tambe temanan cu tin mester di atencion e.o. SKOA werkster. A dialoga riba diferente otro preocupacionnan cu SKOA tin. Minister Endy Croes a indica cu e tabata un bon reunion a duna atencion y oido na e inkietudnan di SKOA, unda cu hunto lo traha riba esakinan. E mandatario di Enseñansa a compromete cu lo pone profesionalnan na mesa pa hunto surpasa e inkietudnan y continua pa dilanti. Enseñansa ta hopi importante pa pais Aruba. Minister Endy Croes y directora di SKOA, sra. Baly a sali contento di e reunion.
ORANJESTAD: Siman pasa riba invitacion di mandatario di Deporte, sr. Kurt Johnson di Total Venue Concepts; un profesional den preparacion di pista di “drag racing” na Merca tabata cuater dia na Aruba. Sr. Johnson den su carera a atende cu hopi pista di drag race rond mundo y tin conocemento y experticio amplio pa evalua, midi, bora, analisa pista y duna un rapport final. Sr. Johnson a bishita e pista di Palo Marga hunto cu miembro di ABM y representante di Ministerio di Deporte unda a analisa kico tur tin cu wordo haci pa e pista por wordo certifica
ORANJESTAD: Fin di siman pasa a tuma luga trabounan grandi na Biblioteca Nacional Aruba unda cu e dos airco grandi (chiller) a wordo instala riba e dak di e edificio. Na luna di december 2021 a inverti 400 mil Florin pa 2 chiller nobo di 60 ton cada un. Pa asina a resolve e problema di airco cu Biblioteca Nacional Aruba tabatin pa mas di dies aña. Minister Endy Croes a bishita Biblioteca Nacional Aruba pa mira e trabounan cu a wordo realisa. E mandatario a expresa di ta contento di mira e alegria riba cara di e empleadonan. Pabien na Biblioteca Nacional Aruba, ‘nos a yega, nos a mira, nos a tuma decision y nos a busca solucion’, e mandatario a finalisa.
