Nos t'ey pa Informa bo
ORANJESTAD – Diahuebs anochi a tuma lugar un ceremonia special na Surf Side Marina, caminda 8 empleado di Dienst Warenkeuring en Hygiene (DWH) a ricibi nan certificado di Bijzonder Opsporingsambtenaren (BOA) despues di a completa e opleiding Buitengewoon Agent van Politie.
ORANJESTAD: Recientemente profesor Luutsen de Vries tabata na Aruba na unda e la reuni cu Mandatario di Enseñansa. Profesor de Vries a wordo contrata pa yuda cu recomendacion number 11 di e “Doorlichting van het Arubaanse Onderwijsbestel”. Recomendacion 11 ta papia di nos leynan di enseñansa cu ta anticua esta e Landsverordening Kleuteronderwijs, Landsverordering Basisonderwijs y Landsverorderning Voortgezet onderwijs. Pa loke ta trata e Landverordening Hoger onderwijs mester wordo revisa y modernisa. Landsverordering Beroeponderwijs y Wet op Toezicht (WOT) di Inspectie Onderwijs no tin un ley existente. Profesor de Vries ta e trek e proyecto di modernisacion di nos leynan den Enseñansa como tambe lo traha e leynan cu no ta existi skirbi e “Memorie van Toelichting” como tambe tin e tarea pa modernisa tur e leynan existente.
ORANJESTAD: Dialuna mainta Minister Endy Croes, ex- MLB pitcher di ekipo Baltimore Orioles, Calvin Maduro hunto cu Charitable Foundation OACF den comunicacion y trabou estrecho cu Gobierno di Aruba a logra baha un container di 20 pia mas cu 50 mil Dollar na materialnan deportivo. Tanto material nobo y segunda mano di baseball, softball y algun di futbol. E materialnan a wordo aloca den warehouse y ekipo di deporte ta sorteer nan pa e siman entrante cuminsa parti a traves di ekiponan, organisacionnan di baseball y softball como tambe pa regala muchanan di menos recurso y muchanan cu ta practica deporte. E proyecto aki ta un colaboracion cu diferente instancianan internacional pa asina trece tambe material pa diferente deporte na Aruba. Minister Endy Croes ta gradici sr. Calvin Maduro, Charitable Foundation OACF y tur cu di un otro manera a haci e proyecto aki un realidad pa nos muchanan y deporte di Aruba.
Awe ta Dia Internacional di Comptabilidad. Relaciona cu e fecha special aki, Departamento di Finansa y Centrale Accountants Dienst a organisa un evento special dedica na esaki. Na e ocasion aki Minister di Finansa Xiomara Maduro tabata invitado y e mandatario a traha tempo, apesar cu ta siman cu ta tratando Presupuesto 2023, pa e por ta presente na e evento y pa dirigi palabra na tur e trahadornan di Departamento di Finansa y Centrale Accountants Dienst. Pa e mandatario tabata un sumo placer di por dirigi su mes na ocasion di e prome celebracion na Aruba di e Dia Internacional di Comptabilidad (Internacional Accounting Day).
Desde dialuna diferente Minister a pasa Parlamento pa trata e presupuesto yDiabierna ta toca turno di Minister di Finansa Xiomara Maduro y Prome Minister Wever – Croes. Premier Wever – Croes a expresa cu e presupuesto 2023 ta un bon prespuesto pa diferente motibo. Aruba ta den recuperacion y ta saliendo for di e gara di e pandemia. Economia a cuminsa desaroya mihor, turismo ta bayendo hopi bon y entrada di gobierno tambe a cuminsa aumenta. Esey ta pone cu ta bay logra e palabracionnan cu a haci cu Hulanda pa 2023, cual lo conduci cu e aña ey lo ta hopi mas trankil compara cu 2022. A delibera cu Hulanda riba esaki y nan ta satisfecho di mira esaki, pues awo por sigui delibera riba otro temanan cu tin pendiente cu Hulanda.
Contra e sospechoso P.T.A.S., ex-ambtenaar di DOW, Ministerio Publico a exigi un castigo di prison di 4 aña pa soborno y labamento di placa. Banda di esey a pidi e verbeurdverklaring di un suma di placa di 1.3 miyon Dollar cu a wordo tuma den beslag na un banco na Curaçao. Segun Ministerio Publico, P.T.A.S. ta esun cu a saca e probecho ilegal mas grandi den e investigacion Avestrus. El a probecha di su relacion cu e minister y a enrikece su mes a costo di e comunidad di Aruba.
ORANJESTAD – Dia 20 di november “Dia Internacional di Mucha” ta e dia cu mundialmente ta para keto na derechonan di mucha. En conexion cu esaki, Gobierno di Aruba ta organisando un actividad social y un marcha dia 19 di november. Henter comunidad ta cordialmente invita pa asisti e actividad y tur scol ta invita pa inscribi y participa na e marcha pa hunto contribui na conscientisacion tocante e tema di derecho di mucha. Den cuadro di esaki, Prome Minister Evelyn Wever – Croes a bishita diferente scol cu ya a inscirbi, pa entrega e articulonan cu nan lo presenta durante e marcha.
Diaranson, Minister di Cultura Xiomara Maduro, a ricibi un copia di e buki ‘Bebe Bira Bon’ for di e escritora Denise de Jongh-Rekwest. Esaki en conexion cu Festival di Buki pa Mucha 2022 cu ta ser celebra e siman aki. E tema cu a ser escogi pa e siman aki ta ‘Biba Natura-Lesa’ cual tin como meta pa stimula muchanan pa bay den naturalesa y lesa bukinan relata na esaki
ORANJESTAD – Diahuebs mainta minister di Turismo y Salud Publico, sr. Dangui Oduber, a duna inicio na e programa di “Kwaliteitsinstituutzorg” cu diferente stakeholders den e ramo di salubridad. E dia aki ta sumamente importante, mirando cu hunto cu tur stakeholders’ den salubridad, lo bay tuma decisionan importante riba e eficiencia y e efectividad di e calidad di cuido na Aruba. E instituto aki ta parti di e trayectoria di e “Landspakket Zorg”, conoci como F3. Manera ta conoci, desde mei di aña 2020 a haci diferente palabracionnan cu Gobierno di Hulanda riba e parti di cuido na Aruba. Esaki ta relaciona cu e fiansa cu Aruba a ricibi for di Hulanda durante pandemia.
Nada nobo, pero bon cu poco poco diferente Ministerio ta realisando cu Aruba no por progresa si nos departamentonan di gobierno no ta funciona manera mester ta. Inversionistanan local of internacional, grandi of chikito, ofreciendo un variacion di producto y servicio, tur tin mester di un localidad pa por eherce nan negoshi. Na Aruba lastimamente a bira un custumber cu ta casi imposibel pa logra un tereno y asina contribui na economia. Prome cu bo entrega e peticion mes caba bo tin e expectativa cu bo lo no logra keda cla. Pa añas bo ta keda den un incertitumbre, sin haya un contesta, niun reaccion den cualkier forma, frustrando, hayando stress, sabiendo bo lo no logra haya bo tereno aunke bo ta cumpliendo cu tur rekisito.Tur esaki cu consecuencia cu inversionista no ta tuma Aruba na serio pa cuminsa nan negoshi, ta perde confiansa den nos pais, Aruba ta perde oportunidadnan pa entrada y cuponan di empleo.
