Category: Gobierno

ORANJESTAD: Durante conferencia di prensa di Gobierno di Aruba diaranson mainta Minister Endy Croes a elabora riba su reciente biahe pa Boneiro. Na luna di maart di e aña aki a cuminsa papia di e idea hunto cu Minister di Enseñansa, Ciencia, Cultura y Deporte di Curaçao Sithree van Heydoorn y Diputado di Infrastructura y Deporte di Boneiro James Kroon. Riba e fecha special unda a conmemora 40 aña di INDEBON, Instituto di Deporte di Boneiro a firma oficialmente e acuerdo.

ORANJESTAD: Diamars anochi den Aula di Universidad di Aruba Minister Endy Croes hunto cu Prome Minister di Aruba Evelyn Wever- Croes a presencia e momento historico y special unda cu pa prome bes un rector ta wordo oficialmente instala como profesor “chair of Translingual practices in educational and professional context” na e academia.

Oranjestad; Minister Endy Croes tabata presente na Universidad di Aruba pa apertura di e conferencia di “Studiesucces Caribische Studenten”. E conferencia ta organisa pa Universidad di Aruba. Tur aña 1600 studiante for di e parti Caribense di Reino Hulandes ta continua cu nan estudio na Hulanda. E studiantenan ta topa cu asina hopi problema durante nan estudio, cu hopi no ta alcansa finalisa nan estudio. Pa desaroya un acercamento concreto pa e problemanan aki, Aruba, Boneiro, Curaçao, Saba, Sint Maarten, Sint Eustatius y Hulanda a bini hunto di 26 pa 28 di september. Ta sondea posibildad pa  haya e miho manera pa desaroya programanan di sosten cu medida concreto y structural, pa mas studiante Caribense por termina nan estudio cu exito. Durante e ceremonia di apertura Minister di Enseñansa y Deporte Endy Croes a hiba palabra:

Turismo ta pilar economico di Aruba, pesey riba “Dia Mundial di Turismo” e ta importante pa para keto y reflexiona riba diferente aspecto cu a tuma luga den transcurso di e añanan. Algo cu no por keda sin menciona ta e impacto enorme cu e crisis di Covid-19 tabatin riba nos turismo, cual Aruba ta recuperando di dje. Gobierno di Aruba ta haci uzo di e ocasion pa gradici cada persona cu a traves di nan curashi, animo y trabou duro, ta haci cu Aruba su turismo ta recuperando y creciendo.

Recientemente riba invitacion di e Embahador di Reino Hulandes na Colombia, sr. Ernst Noorman, Minister Xiomara Maduro tabata presente na e evento ‘Experience the Netherlands 2 na Colombia. Durante e evento aki companianan Hulandes a presenta nan producto y servicio na e comunidad mercantil di Colombia. Tabata interesante pa mira e toke di inovacion cu tur compania a trece dilanti. Minister Maduro a haci uso di e oportunidad pa combersa un rato cu varios compania di Colombia cu ya caba ta haci negoshi na Aruba. E mandatario a gradici nan pa e confiansa y a extende e invitacion pa mas compania explora e oportunidadnan cu ‘Aruba, La Isla Feliz del Reino Holandes’ ta ofrece pa haci negoshi.